Mae gwrthficrobau yn feddyginiaethau a ddefnyddir i ladd neu arafu twf microbau ac mae gwrthfiotigau yn feddyginiaethau arbennig a ddefnyddir gan feddygon i ladd bacteria niweidiol. Mae rhai gwrthfiotigau yn atal y bacteria rhag atgenhedlu ac mae rhai eraill yn lladd y bacteria. Mae gwrthfiotigau'n trin clefydau heintus a achosir gan facteria, fel llid yr ymennydd, twbercwlosis, a niwmonia. Nid ydyn nhw'n niweidio firysau, felly ni all gwrthfiotigau drin afiechydon fel annwyd, ffliw a COVID-19, sy'n cael eu hachosi gan firysau.

Cyn i wrthfiotigau gael eu dyfeisio, roedd bacteria niweidiol yn peryglu bywyd. Heddiw, fodd bynnag, mae llawer o heintiau bacteriol yn hawdd eu trin gyda gwrthfiotigau - ond mae bacteria yn ymladd yn ôl. Trwy gysylltiad cynyddol â'r gwrthfiotigau, mae bacteria yn datblygu ymwrthedd iddyn nhw. Mae hyn yn golygu bod heintiau bacteriol yn bygwth bywydau unwaith eto.

Yn y wers hon, caiff myfyrwyr eu cyflwyno i'r bygythiad iechyd cyhoeddus byd-eang cynyddol a achosir gan ymwrthedd gwrthficrobaidd (AMR). Maen nhw'n dysgu sut cafodd gwrthfiotigau eu darganfod, eu cyfyngiadau, a pham mae ymwrthedd i wrthfiotigau yn fygythiad.