Mewn rhai achosion, mae angen help ar y system imiwnedd. Mae gwrthficrobau yn feddyginiaethau a ddefnyddir i ladd neu arafu twf microbau. Mae gwrthfiotigau naill ai'n facterioleiddiol, sy'n golygu eu bod yn lladd y bacteria, neu maen nhw'n facteriostatig, sy'n golygu eu bod yn arafu twf bacteria.

Mae bacteria'n addasu drwy'r amser i ddatblygu ffyrdd o beidio â chael eu lladd gan wrthfiotigau. Gelwir hyn yn ymwrthedd i wrthfiotigau. Mae ymwrthedd yn datblygu oherwydd mwtaniadau yn y DNA bacteriol. Gall bacteria ag ymwrthedd i wrthfiotigau gael eu cario gan bobl iach neu sâl a gallant ledaenu i eraill yn union fel y byddai mathau eraill o ficrobau, er enghraifft trwy ysgwyd llaw neu gyffwrdd â phob math o arwynebau ar anifeiliaid, llysiau neu fwyd lle mae bacteria'n bresennol.

Mae ymwrthedd i wrthfiotigau yn digwydd mewn bacteria a geir yn y corff, mewn anifeiliaid neu yn yr amgylchedd, oherwydd gorddefnyddio a chamddefnyddio gwrthfiotigau. Po fwyaf aml y bydd rhywun yn cymryd gwrthfiotigau, y mwyaf tebygol ydyn nhw o ddatblygu bacteria sy'n gwrthsefyll gwrthfiotigau yn eu corff. Er mwyn atal ymwrthedd, dim ond yn unol â phresgripsiwn meddyg neu nyrs y dylid cymryd gwrthfiotigau.

Yn y cynllun gwers hwn, bydd myfyrwyr yn dysgu sut mae gwrthfiotigau'n gweithio i ladd bacteria a sut mae bacteria'n datblygu ymwrthedd i wrthfiotigau. Byddan nhw'n dysgu nad yw pob gwrthfiotig yn driniaethau effeithiol ar gyfer pob bacteria ac mai dyna pam ei bod yn bwysig cymryd gwrthfiotigau yn unol â phresgripsiwn meddyg.