Gall bacteria dyfu ar ddannedd, gan glystyru a ffurfio sylwedd gludiog o'r enw plac deintyddol. Byddwch yn ei weld yn eich ceg eich hun fel llinell hufennog o amgylch eich dannedd neu efallai y byddwch yn ei deimlo fel haen ffyrraidd gyda'ch tafod. Os nad yw plac yn cael ei frwsio i ffwrdd yn rheolaidd, neu os oes siwgr yn cael ei fwyta'n aml yn y diet, gall y bacteria yn y plac arwain at bydredd yn y dannedd.

Mae iechyd deintyddol yn eithriadol o bwysig; mae gan 23% a mwy o blant Lloegr bydredd dannedd a dyma'r prif reswm y mae plant rhwng 5 a 9 oed yn cael eu derbyn i'r ysbyty. Y newyddion da yw bod modd atal pydredd dannedd trwy gyfyngu ar sawl gwaith rydyn ni'n bwyta bwydydd a diodydd gyda siwgr ychwanegol, brwsio ddwywaith y dydd gyda phast dannedd fflworid, a gweld y deintydd yn rheolaidd i wirio iechyd ein dannedd a'n deintgig.

Yn y cynllun gwers hwn, mae myfyrwyr yn dysgu beth yw plac a sut gall arwain at bydredd dannedd. Trwy gyfrwng arbrawf, maen nhw'n nodi pa mor anodd y gall fod i frwsio plac i ffwrdd os yw'n cael ei adael am gyfnod rhy hir, ac y gall osgoi bwydydd siwgraidd a brwsio rheolaidd leihau'r risg o bydredd yn y dannedd.