Mae heintiau'r llwybr anadlol (RTI) yn heintiau sy'n digwydd yn yr ysgyfaint, y frest, y sinysau, y trwyn a'r gwddf, er enghraifft, annwyd a pheswch, y ffliw, a niwmonia. Gall heintiau o'r fath ledaenu'n hawdd o berson i berson trwy'r awyr, trwy gyswllt o berson i berson (cyffwrdd dwylo, cofleidio, cusanu), neu drwy gyffwrdd ag arwynebau halogedig.

Pesychu a thisian yw ffordd ein corff o geisio cael gwared ag unrhyw ficrobau a gronynnau niweidiol rydyn ni wedi'u hanadlu i mewn fel nad ydyn nhw'n mynd yn ddyfnach i'n llwybr anadlu. Mae'n bwysig bod hylendid resbiradol da yn cael ei addysgu o oedran ifanc, a bod negeseuon allweddol yn cael eu hadeiladu dros amser. Mae hyn yn arbennig o bwysig wrth agosáu at dymor annwyd/ffliw y gaeaf bob blwyddyn, neu pan fo brigiad o achosion o glefyd heintus.

Mae'r cynllun gwers hwn yn helpu myfyrwyr i ddeall pam mae hylendid resbiradol yn bwysig a sut beth yn union yw arfer da. Maen nhw'n gwneud hyn drwy greu tisiad enfawr, a nodi sut gall rhwystrau gwahanol atal microbau niweidiol rhag lledaenu.