Mae gan y corff lawer o amddiffynfeydd naturiol i helpu i ymladd yn erbyn microbau niweidiol a all achosi haint. Fodd bynnag, mewn rhai achosion, gall microbau groesi'r rhwystrau hyn a mynd i mewn i'n cyrff. Y rhan fwyaf o'r amser mae'r system imiwnedd yn trechu unrhyw ficrobau niweidiol sy'n mynd i mewn i'r corff, fodd bynnag, mewn rhai achosion mae angen cymorth ar y system imiwnedd.

Mae gwrthfiotigau yn feddyginiaethau arbennig a ddefnyddir i drin clefydau bacteriol, fel llid yr ymennydd, twbercwlosis a niwmonia. Dydyn nhw ddim yn niweidio firysau na ffyngau. Mae rhai gwrthfiotigau yn atal y bacteria rhag atgenhedlu ac mae rhai eraill yn lladd y bacteria.

Yn y cynllun gwers hwn, mae myfyrwyr yn archwilio sut gall atal heintiau osgoi'r angen am wrthfiotigau, a sut bydd ein system imiwnedd yn aml yn ymladd haint heb wrthfiotigau. Trwy ddefnyddio stribedi comig, cyflwynir myfyrwyr i bwysigrwydd defnyddio gwrthfiotigau yn unol â chyfarwyddiadau meddyg yn unig.