Ymwrthedd gwrthficrobaidd (AMR) yw un o'r bygythiadau iechyd byd-eang mwyaf sy'n wynebu'r byd. Mae'n digwydd pan fydd bacteria, firysau, ffyngau a pharasitiaid yn newid dros amser ac nad ydyn nhw'n ymateb i feddyginiaethau mwyach, gan wneud heintiau yn anoddach eu trin, a chynyddu'r risg o glefyd, salwch a marwolaeth.

Os na wnawn ni unrhyw beth, mae Sefydliad Iechyd y Byd wedi rhagweld y byddwn yn gweld 10 miliwn o farwolaethau erbyn 2050. Mae Llywodraeth y DU wedi creu gweledigaeth 20 mlynedd i atal a rheoli ymwrthedd gwrthficrobaidd.

Y newyddion da yw y gallwn weithredu. Trwy atal heintiau a defnyddio gwrthficrobau'n briodol, gallwn atal a rheoli ymwrthedd gwrthficrobaidd.

Mae'r rhaglen e-Bug yn cefnogi ymdrechion Llywodraeth y DU i ymateb i ymwrthedd gwrthficrobaidd drwy hyrwyddo addysg gyhoeddus ar:

• Atal heintiau, gan gynnwys hyrwyddo arferion hylendid da mewn cartrefi, ysgolion a chymunedau
• Deall symptomau ac arwyddion heintiau, a gwybod pryd i hunanofalu a phryd i ofyn am gyngor proffesiynol
• Gwybod risgiau a buddion gwrthficrobau, a dim ond eu cymryd yn ôl y cyfarwyddiadau a roddir gan weithiwr gofal iechyd proffesiynol

Rydym ni'n gwneud hyn trwy ddarparu negeseuon i blant a phobl ifanc trwy'r ffynonellau gwybodaeth y maen nhw'n ymddiried ynddyn nhw, gan gynnwys eu hysgolion, eu rhieni a'u gofalwyr, a'u harweinwyr cymunedol.

Dechreuodd y rhaglen e-Bug yn 2006, ac fe'i hariannwyd yn wreiddiol gan y Comisiwn Ewropeaidd. Mae bellach yn cael ei gweithredu gan Asiantaeth Diogelwch Iechyd y DU, gyda'r rhaglen yn parhau i gael ei gweithredu ar draws cymunedau yma yn y DU a thramor.